परांडा जवळील कुंभेजा शिवारात मध्यरात्री सशस्त्र दरोडा
सहा दरोडेखोरांच्या समोर 70 वर्षीय माजी सैनिक पत्नीच्या संरक्षणासाठी ढाल बनून उभा
धाराशिव – परंडा तालुक्यातील कुंभेजा शिवारात मध्यरात्री सशस्त्र दरोडेखोरांनी एका शेतवस्तीवर धाडसी दरोडा टाकला. यावेळी घराचे मालक आणि भारतीय सैन्य दलाचे निवृत्त सुभेदार विश्वनाथ मुरलीधर जगताप (वय ७०) यांनी दरोडेखोरांशी निकराची झुंज दिली. या झटापटीत सहा दरोडेखोरांनी केलेल्या शस्त्रहल्ल्यात जगताप गंभीर जखमी झाले असून, त्यांना उपचारासाठी पुणे येथील रुग्णालयात हलवण्यात आले आहे.
विश्वनाथ जगताप हे कुंभेजा येथील आपल्या शेतात घर बांधून पत्नीसह राहतात. मध्यरात्री १२.३०च्या सुमारास वीजपुरवठा नसताना सहा सशस्त्र दरोडेखोरांनी त्यांच्या वस्तीवर धाड टाकली. दरोडेखोरांनी घरात शिरून कपाटांची उचकापाचक केली आणि जगताप यांच्या पत्नीच्या गळ्यातील सोन्याचे दागिने हिसकावून घेतले. यावेळी जगताप यांनी दरोडेखोरांना रोखण्याचा प्रयत्न केला असता, त्यांच्यावर धारदार शस्त्राने पाच ते सहा वार करण्यात आले. गंभीर जखमी अवस्थेतही त्यांनी आरडाओरडा करून नागरिकांना मदतीसाठी बोलावले. परिसरातील नागरिक जमा होत असल्याचे पाहून दरोडेखोरांनी घटनास्थळावरून पळ काढला.
या घटनेने परिसरात खळबळ उडाली असून, पोलिस अधिक तपास करत आहेत. दरम्यान या दरडेखोरांनी जगताप यांच्या घरातील दोन तोळे सोन्याचे गंठण साठ हजार रुपयांची रोकड लुटून नेले असून पोलिसांनी घटनास्थळी धाव घेतली फॉरेनसिक टीम, डॉग स्कॉड पथकाच्या मदतीने आरोपींचा शोध घेण्यास सुरुवात केली आहे
