धाराशिव – राज्य निवडणूक आयोगाने नगरपरिषद सार्वत्रिक निवडणूक २०२५ चा कार्यक्रम घोषित केला असून,या कार्यक्रमामध्ये धाराशिव जिल्ह्यातील धाराशिव,तुळजापूर,नळदुर्ग, उमरगा,मुरुम,कळंब,भूम व परंडा या नगरपरिषदांचा समावेश आहे.
मतमोजणीची प्रक्रिया शांततेत व सुरळीत पार पडावी,या दृष्टीकोनातून जिल्ह्यातील खाली नमूद नगरपरिषद हद्दीतील २१ डिसेंबर २०२५ रोजी भरविण्यात येणारे आठवडी बाजार बंद ठेवणे अथवा पुढे ढकलणे आवश्यक असल्याने,द मार्केट अँड फेअर अॅक्ट १८६२ चे कलम ५(अ) मधील तरतुदीनुसार पणन संचालक, महाराष्ट्र राज्य,पुणे यांनी मान्यता दिलेली आहे.
जिल्हाधिकारी तथा जिल्हादंडाधिकारी किर्ती किरण पुजार यांनी द मार्केट अँड फेअर अॅक्ट १८६२ चे कलम ५ व कलम ५ (अ) नुसार प्राप्त अधिकाराचा वापर करून, जिल्ह्यातील खालील नगरपरिषद हद्दीतील आठवडी बाजार रविवार दिनांक २१ डिसेंबर रोजी मतमोजणीच्या दिवशी बंद ठेवण्याचे आदेश दिले आहे.बंद ठेवण्यात येणारे आठवडी बाजार : धाराशिव – रविवार,नळदुर्ग – रविवार,उमरगा – रविवार,मुरुम – रविवार,परंडा – रविवार या दिवशी बंद राहतील.
जिल्ह्यातील वरील नमूद नगरपरिषद हद्दीतील आठवडी बाजार रविवार २१ डिसेंबर २०२५ रोजी मतमोजणीच्या दिवशी बंद ठेवण्यात येऊन,त्या दिवशीचे बाजार अन्य दिवशी भरविण्यात यावेत.
